Joan den larunbatean, uztailak 28, Atarrabiako Gazte Asanbladako kideak «Irlatxoa» izeneko eremu naturalera itzuli ziren. Adierazi zutenez, «2005eko udan  zuen itxura zikin bera erakusten du orain». Gazte Asanbladakoak bertara joan eta esparrua txukundu egin dute. Era berean, jarduerak prestatu dituzte Gazte Asanbladekoek: kontzertuak, zinema eta futbito txapelketa, este baterako.

Orain dela bi urte, Arga ibaiaren inguruan dagoen Irlatxo eremuak egoera kaxkarra erakusten zuen. Hori dela eta, AGA erakundeak ibai inguruko aldea garbitu zuen. Atarrabiako Gazte Asanbladak lehenagoko komunikatu batetan adierazi zutenez, zenbait erakunderen utzikeria dela eta, 2005eko udan garbiketak hasi baino lehenagoko egoera berdinean aurkitzen da orain. Horrekin batera, zenbait instituziok egiten zuten politika ere salatu zuten. Diotenez, «aldaketa klimatikoaren aurkako politikak egin beharrean, naturaren aurkako ekimenak egiten dituzte. Eredurik nabarmenenak, Itoitz eta AHT (Abiadura Handiko Trena).

Irlatxora itzultzearekin, auzolana berreskuratu nahi zuten gazteek, «geure arbasoek erabiltzen zuten lan eredua baita». Nabarmendu zutenez, autogestioaren bitartez proiektu bat aurrera eramatea da haiek nahi zutena, Udalaren inplikaziorik gabe. Era berean, proiektua aberatsagoa egiteko asmoarekin, Atarrabiako herria animatu nahi dute haiek antolaturiko ekimenean parte hartu dezaten. dagoeneko, zinema saioak, futbito txapelketak eta kontertuak antolatu dituzte. Baina dena ez da horrekin bukatu. Izan ere, sexualitate eta berdintasunari buruzko hitzaldiak eta tailerrak ere prestatu baitute.